Ede-r nggahi ba Rato ede : "E Kalai, ai-na teka-mu ni'u nahu ede, nggara mu-teka-si made ama-m, mu-londo-si made ina-m, mu-midi mboha-si made ndai-mu." Ede-ra ringa kai ba La Kalai nggahi Rato ede. "Taho mpara made ama-ku," nggahi La Kalai."
Ede-ra teka kai-na ni'u ede, kalondo mena kai wua-na, ede-ra londo batu kai-na ba La Kalai. Lemba-na ni'u ede, dula di uma-n. Na-eda-ku ama-na ro ina-na mbui mena-pu wara-na. Nggahi kananu kai ba La Kalai : "Na-cowa pala Rato ake," Ede-ra rai-rai wali kai-na La Kalai, na-lao aka lewi-n. Ntika na-nggao-ku Rato : "He Rato, nggara ta-loja lao ari-sa ta-mbi'a sambura, ta-loja lao dei-sa ta-mimi made." "E Mboda-e, wari-pu loja ede, ta-lao ari! Taho wali-pu mbi'a sambura labo mimi made-ta," nggahi kai Rato labo Mboda-na ede.
Ede-ra wari kai loja ede, lao ari-na. Wati-pu sabune loja lao ari-na, ede mpara mbi'a sambura poda-na lopi Rato aka-n ede. Dou labo-na wa'u-ra made mena, ne'e Rato labo Mboda mpa mamori maliwa labo kapenta lopi-na sa-dompo. Raka-pu di mamanggo, nggahi kai ba Rato : "Tundu-pu kapenta ede, lao mbei-pu La Kalai! Bune santika Rato wa'u-ra mbi'a sambura lopi-na. Bune santika kapenta sa-tobe ake ndawi wea-pu kai kapa to'i kapa na'e, keci to'i keci na'e, sakona to'i sakona na'e, di ade mapidu nai mpabua-ku cumpu-na!"
Lao Kai Mboda raka ro karingga La Kalai nggahi Rato. "E Mboda-e, su'u kai ba nahu tuta, tundu kai lipi ba nahu ra-parenta Rato ede. Nde pala sato'i wati wara marakani nahu ake ne'e ndawi kai kapa keci. Kapo ake lao ngge'e ada wea-pu nahu. Ake nda'u sa-dompo! Kau-pu ndawi wea garagaji to'i garagaji na'e, binggu to'i binggu na'e, pa'a to'i pa'a na'e, puti to'i puti na'e, sambori to'i sambore na'e ro sa-mena-na marakani ne'e ndawi kai lopi," cambe kai ba La Kalai.
Ede-ra dula kai-na Mboda ede, lao ngge'e ada kai-na di Rato, na-karinga mena-ku ra-nggahi La Kalai masanggu-na ndawi kapa ro keci.
"Nde pala wati wara marakani-na Ruma-e. Ake nda'u sa-dompo. Kau-na ndawi sa-mena-n marakani ne'e ndawi kai kapa."
Ede-ra kaporo kai Rato ma-eda nda'u sa-dompo, ne'e ndawi kai marakani masandede mboto. Nggahi wali kai Rato : "Hai Mboda, lao wa'a wali-pu wadu ake, kau-pu La Kalai ndawi wea nahu kapa, di ade matolu naui tempo-na mpabua cumpu-na."
Ede-ra lao kai Mboda di uma La Kalai. "Au-si habar, Mboda?" Sodi ao kai ba La Kalai. "Wara-ra ra-parenta Rato makau wa'a wadu ake, ndawi wea-pu rua-n kapa, hampa tolu nai mpabua cumpu-na," nggahi kai Mboda. "Tarima-ku ba nahu ra-parenta Rato ede," nggahi kai ba La Kalai.
Ede-ra dula kai-na Mboda ngge'e ada kai-na di Rato. Na-karinga labo Rato : "Na wi'i-ku wadu akan-de, na-sanggu wea-ku ndawi kapa." "Na-wa'u sara tolu nai, lao weha-pu kapa ede!" Nggahi kai Rato.
Ede mpara dula-n Mboda di uma-na.
Wa'u mpudu raka tolu nai. Lao wali kai-na Mboda di La Kalai, nggahi-na : "Kau mai ba Rato weha kapa wadu ede" " Wa'u-du cumpu mena kapa wadu ede, dua nai mpa ra-ndawi ba nahu. Nde pala sato-i wati-pu wara mangga-na," cambe kai ba La Kalai.
Ede-ra mbei kai ba La Kalai sarae sa-kale'a labo nggahi-na : "Lao wa'a-pu di Rato, kau-pu ndawi wea mangga ndai labu kai kapa ede." Ede-ra lao wa'a kai ba Mboda sarae sa-kale'a. Nggahi kai ba Mboda : "Na-wa'u-du cumpu Ruma-e, kapa wadu ede, dua nai mpa ntoi-na ndawi ba La Kalai. Nde pala wati-pu wara mangga-na. Ake sarae sa-kale'a. Ake kau-na mbei ita Ruma, ta ndawi wea-pu mangga." Ringa ba Rato, ede mpara kaporo-na labo nggahi-na : "Lao karinga-pu Mboda-e! Ra-katei kai ba ina-n ro katei ba ama-na ndawi mangga sarae. Bune mpara pahu-na sarae, hina sara ba oi, na-leli mena sarae ede!"
Ede-ra lao wali kai Mboda di uma La Kalai, karinga kai ba mboda nggahi Rato : "Ra-katei kai ba ina-m ro katei ba ama-m, nggomi Kalai-e, mandawi mangga sarae, ndede-ku eli-na Rato."
"Nemba mboto-mboto-ku nahu di penta ra tini Rato. Ra-katei ja kai ba ina-n ro katei ba ama-n Rato ede mandawi kapa wadu?" Cambe kai ba La Kalai.
Ede-ra lao kai Mboda makaringa bune ra-nggahi La Kalai aka-n de. Ringa kai ba Rato, kaporo kai-na La Kalai. Nggahi ro parenta-na dou labo-na : "Lao leto-p lako ede, wa'u sara leto. Lao wa'a-pu aka sera, ta-ka'a kancore-ku!"
Ede-ra lao kai dou mamboto malao wa'u ra leto La Kalai ro wa'a kai aka sera. Wa'u mpara rongga di sera, ai na-mbia-r.
"Na-ncara-ncua-ra ka'a-ta La Kalai ake, nai sidi ampo ta-ka'a," nggahi kai ba Rato.
Ede-ra leto pete kai di fu'u haju. Dula mena-ra Rato labo dou labo-na, ngge'e mpara La Kalai kese-kese-na.
Makento ba ede, ntika wara mpara ana sangaji Jawa mamade dou sodi-na. Na-nefa-nefa-ra, ntika na-lampa di kompe La Kalai. Ede-r nggahi kai-na ana sangaji ede : "E-cina-e, au-si rawi-mu kandake kai weki-mu ake?" "Nahu ake ne'e nika labo ana Rato, nde pala na kara-kiro mena weki-ku. Ede asal ne'e mai kamapu kai weki-ku," cambe kai ba La Kalai.
Nggahi kai ba ana sangaji ede : "Mai, cina-e, nahu mpara ndai macepe nggomi nika labo ana Rato ede." "Wati loa-n ndede. Mai ka-ra ndede-n nahu wa'u-du mboto rugi-ku ro ana Rato ka mai dou taho weki-n. Monca kancere, naru honggo-n hampa tini-n. Wati-du wara dou masama labo taho weki-na," nggahi kai ba La Kalai.
"E cina-e, kasoi ade-mu labo nahu. Mbei-pu dou sodi-mu ede, weha mena-pu kani-kani nahu ake, cori-cori masangganga, tali-bana bato, here loko cinde, sambolo songke, tembe songke, tinti kambaya. Weha-pu sara'a mena ba nggomi!" Ede-r nggahi kai ana sangaji ede.
"Na-wa'u sara ndede, taho weki-na, lo'a-pu nahu ake!" Ede-r nggahi kai La Kalai.
Ede-ra lo'a kai ba ana sangaji ede. Wa'u mpudu lo'a, ede-ra runcu mena kai sa-mena-na kani-kani ana sangaji ede, na-mbei-du La Kalai. Tembe ro baju La Kalai mampasa-mpasa, ede-ra kani-na ba ana sangaji ede. Ede-ra leto pete kai ba La Kalai ana sangaji ede di liri haju ra pete kai La Kalai aka-n. Ede mpara dula-na La Kalai di uma-na. Na-ngge'e-ra ana sangaji ede kese-kese-na di sera.
Ntika bala ai sidi, na-mai-ra Rato labo sa-mena-na dou labo-na. Wara matundu haju, wara mawa'a afi. Raka mpudu di hidi La Kalai, ede-ra ne'e ka'a kai-na. Kanggica kai ana sangaji Jawa ede : "Lai-na nahu La Kalai, lai-na nahu La Kalai." "Ai-na kade'e nggahi lako ede, cou dou-dou-ra mamai cepe weki-na labo nggomi. Ka'a-pu dambe!" Nggahi kai ba Rato.
Ede-ra ka'a kai ana sangaji ede, na-wotu kaparupae-ra tuta-na. Ede mpara cua dula mena kai-na di uma-na.
Makento mpara ba ede, na-raka-ra tolu nai wa'u-ra ka'a ede. La Kalai na-kani-kani-ra kani ana sangaji Jawa, na-lao-ra di amba. Wa'a talima tolu mbua labo rafa sa-sonco. Ede-ra kidi kai-na di woha amba. Pala wara ja Mboda Rato di amba ede. Ede-ra nggahi kai ba Mboda :"Wa'u-du ara pala ndai-mu watu do doro?" "Io, ara-du ndai-ku, ku-ne'e lao ngge'e ada labo Rato," nggahi kai ba La Kalai.
"Pea sa-dou-na, nahu ku-malao ulu ngge'e ada wa'u labo Rato," nggahi kai Mboda.
Ede-ra lao rai-rai kai-na Mboda makaringa Rato. "E Ruma-e, na-wa'u-ra mai La Kalai," nggahi kai ba Mboda. "Cowa-na binata mboda ake, bune pahu-n ne'e loa kai-na mai wali La Kalai labo wa'u-ra mpangi ro wotu tuta-n," nggahi kai ba Rato.
"Wati cowa-ku ruma-e, na-wara poda La Kalai. Na-wa'u mpudu kani sambolo songke ro tembe songke, cori-cori, tali-bana bato, kidi wari ancu aka amba. Wara talima ra-wa'a-n, labo au wali kombi di ade sonco," nggahi kai Mboda. "Lao ou wea-pu nahu!" Ede-ra nggahi kai ba Rato ede.
Ede-ra lao kai Mboda malao ou La Kalai. Lao kai La Kalai mangge'e ada di Rato, raka mpa di Rato, ou ao kai ba Rato : "Mai Kalai-e. Au habar do woro?" "Ai Ruma-e, wati-da wara madawara, masaniki-niki mantau eli, masaniki-niki ndai ngaha ra nono, masaniki-niki kani ro lombo. Niki ra ndai mena akadawa, wati-du nde weha kai ntewi nggari-na. Ake kani-kani ra-mbei mena ba ama ro ompu ita Ruma-ku. Ede mai kakai-na lamada mamai weha ita Ruma-ku, na ipi lingi ade-na labo ita Ruma. Sa-wa'u-wa'u topo lao roci, kangampu mpara doho, sura kidi mpa. Ndede-ku pahu nggahi ama ro ompu ita Ruma-ku," nggahi kai ba La Kalai.
Nde ringa kai ba Rato nggahi ra-karongga ba La Kalai, ede mpara nangi Rato. Nggahi kai Rato : "Lao boro wea-pu haju ndai ka'a kai-mu nahu, ku-ne'e lao sa-dou-na do woro!"
Ede-ra lao mena kai Mboda labo dou labo-na maboro haju. Wa'u mpara boro haju, ede-ra dula karinga kai-na Rato : "Wa'u mpudu boro haju Ruma-e!" "Lao ka'a doho-pu nahu ndara-s sambia!" Nggahi kai Rato.
Ede-ra cua dula mena kai-na. Raka-pu ai mambia, lao wali kai-na La Kalai, lao ou Rato. Ede-ra ka-ambi kai weki Rato malabo Mboda malabo sa-mena-na ada ro kau-na lao aka sera. Ede-ra ndu mena kai haju masabune-bune mboto-n ede, ede mpara ka'a-n haju ede. Wa'u mpudu ka'a, taho-ra kalea-na. Ede mpara cua-cua nggoncu mena-na di ade afi labo-ku neo ade-n, lao batu-na Rato ba ne'e-na eda rasa woro. Ede mpara cua-cua wotu tuta-na, made mpangi mena. Ndadi ana ro wei-na, ka wei ba La Kalai. Uma ra salaja-n kampo ro mporo-na weha ba La Kalai. Ede mpara cumpu-na.
Di ambil dari :
Jonker, J.C.G..Bimaneesche Teksten (Mpama Mbojo).2004.Nusa Tenggara Barat
0 komentar:
Posting Komentar